Finde den folgenden Gegenstand beim Surfen auf Blickamabend.ch und gewinne tolle Preise!
Suche starten
Du hast den Gegenstand gefunden! Klicke auf Mitmachen und nehme am Gewinnspiel teil.
Mitmachen

Gimmas Welt

19.04.2016 67 Reax
teilen
teilen
15 shares

Flur-Lärm

Rapper Gimma.

As git nur öpis piinlichers, als bim Sex verwütscht werda

Sünnala am Mittelfinger-Meer. Chillwave, sägend mini Walliser Kollega öpadia. Au wenn kein Mensch ussert mina Walliser Kollega verstoht, was si damit gnau meinend. Ma muas und söll dia grossa Piinlichkeita mit Humor neh, anders gohts nid.

Waisch no, früaner. Früaner, wo mr nid so wirkli zu da Maitla händ dörfa. Weder im Dorf, no ir Schual. Aber irgendwenn so ab in dr Sek und Real. Ab dr Sek oder der Real hätma länger ussa dörfa und wenn ma länger usa hät dörfa, isch ma au wiiter weg ganga. Ma hät erkundet, dr Rest vum grossa Dorf Domat/Ems. Und dr Rest vum andra Gschlecht. Jo um di 94 werdi mi do denks kli intensiver beschäftigt ha, schätzi Mol. D Amis händ sicher a Kriag gfüahrt und irgendwo in Graubünda häns a McDonalds oder a sustiga Gugus usam Imperial-Schlachtschiff vur Wirtschaft vum geilsta Land vur Welt eröffnet. So wia jedes Johr siit denn öpa. Langsam simmer erwachsener worda, aber wehe diar du häsch 2 gseh knutscha. Ehrli, i han no hüt ab und zua z Bedürfnis denn luut «Popcorn» rüafa... Wenn so ufam Töffli an Bahnhof tuckeret bisch und döt dr Roman und Delia oder dr Adi und d Major - khai Ahnig, irgendwer hät immer - knutschend troffa häsch, häts gheissa Schumi gib Gummi. Das hani echt nid brucht. Wennschudennschu selber aber sicher nid andera dabii zualuaga!

Aber eba, darum gohts jo nidamol. I han nu schnell wella abstecka, was miar schu piinlich isch.

Und waisch wia piinlich isches, wenn dini Muater in dis erschta Mol platzt? I schu. Dr Hund hät z Zimmer gstürmt und i han denn das irgendwia wella verhindera, as isch luut worda und naja, wenigstens hämmer verhüatet. Dr Baby-Elefant hät a Kautschuk-Rägamäntali akah wia eina vu da ganz Grossa. Aber eba, an wiiteri sexänlichi Beschäftigunga isch nüma z denka gsi. As isch piinlich und peinlich gliichziitig gsi. Allna Beteiligta usser am Hund. I glauba das isch z piinlichsta Erlebnis vum Leba gsi. Bis etz.

Hüüt bini mini kli Wanderig go macha, vu miar dahai Richtig Untervaz, dr hinter Weg bim Oldis Kieswerk. An eigentlicha Gheimtipp. Viel Lüüt kennend das Wägli nid und ab und zua bringi döt au mol eini hinderi, dr Romantik wega, natürli. Abglega, ruhig und au akli a wilda Trampelpfad ischs. Ma kann schu vuma Kilometer Entfernig säga, dass döt khai Schwii isch, wells vur Entfernig grad aso knapp ufs Aug ufgoht uf beidi Siita grechnet... wenn döt jetzt keina umalauft, dä Kilometer hinter diar, bisch a schöni Viartelstund alai uf dem Wegli. Hani gmeint. Aber i han dia Rechnig natürli immer für mi selber gmacht und i bin jo dä vorna, nid dä hina, sust. I han mi also gar nia damit beschäftigt, dasi öppert könnti treffa, aber vielmeh damit, das mi niamert söll gseh, oder üs, aber dia, dia andra, an dia hani wia nid denkt.

Ma kunnt sonera Felswand entlang um die erscht Kurva. Und ma khört hald au nid viel, wema grad voll luut am Noel Gallagher sini High Flying Birds lost. Aber gseh tuat ma no guat. Zum eina d Ussicht rechts usa über da wundervoll grüan-grau Rhii, uf dr andera Siita dr schlichti Felsvorsprung mit dera kliina Wiisa und dena 2 Menscha, wo grad vor mina Auga in Richtig zimli akustisch inszeniarta Orgasmus riitend. Bis Sie mi gseht und ma weiss jo au nid wia reagiara, drum hani aifach «Hallo» gsait und bin wiiter gloffa. I schäma mi hüt no.

teilen
teilen
15 shares
Wie findest du den Artikel?

Unsere Leser empfehlen

Meist gelesen

Bilder des Tages